Работилница за ретки болести

Денес, 4.12.2019, во просториите на Црвен крст Охрид, членовите на Вики Клуб Охрид, што го води професорката Наташа Неданоска, се запознаа одблиску со ретките болести. Нивни гостин беше Гордана Лолеска, активист во здружението “Живот со предизвици”. Оваа средба се оствари со заеднички мотив, а тоа е збогатување на Википедија на македонски јазик со статии на тема РЕТКИ БОЛЕСТИ. Целта е повеќе од јасна, за секоја дијагноза на ретка болест членовите на Вики клубот да уредат соодветна статија, потпомогнати од Здружението за ретки болести. Овој процес се очекува да трае подолг период, а едно заокружување би се очекувало на одбележувањето на Светскиот ден на ретките болести во февруари, идната година.

ПОВИК ЗА ВОЛОНТИРАЊЕ НА КОНФЕРЕНЦИЈА

Ако имаш желба да учествуваш во организирање, да стекнеш нови искуства и да запознаеш нови луѓе, пријави се како волонтер на деветтата средба меѓу Википедијанците од Централна и Источна Европа, Wikimedia CEE Meeting, што ќе се одржи во Охрид од 18-20 септември 2020 година.

Wikimedia CEE Meeting е годишна конференција на Википедијанците од Централна и Источна Европа, со цел умрежување, размена на знаења и искуства, а која се одржува во различни држави. Деветтата конференција ќе се одржи во Охрид. Доколку сакаш да си дел од неа, пријави се како волонтер.

Задачи:

Задачите кои се наменети за волонтерите се пред сè од логистички карактер, односно организирање на промотивни активности, помагање на гостите при самата конференција, преземање на некои одговорности при формалните и неформалните активности и слично.

Времетраење:

Од сите волонтери што ќе бидат ангажирани се очекува својот придонес да го дадат во деновите пред, за време и по конференцијата, во зависност од задачите што ќе им бидат доделени. Доколку ви се допадне работата со ГЛАМ Македонија, можете да учествувате и при организирање на другите активнсоти на здружението.

Рок и начин на пријавување:

Сите заинтересирани треба да испратат кратка биографија и мотивирачко писмо на електронската пошта: glammacedonia@gmail.com најдоцна до 30 ноември 2019 година.

Придобивки за волонтерите:

  • Искуство
  • Дружење
  • Знаења
  • Потврда за волонтирање

За сите прашања слободно обратете се на горенаведената електронска пошта.

РАБОТИЛНИЦА ЗА ОРГАНСКА ХРАНА

На 29 октомври 2019 година, се одржа тричасовна работилница во Порта Македонија, во соработка со здружението „Биовита“ од Кавадарци. На работилницата присуствуваа ученици кои се членови на Вики Клубот во Музеј на македонската борба, и кои создадоа осум нови статии на Википедија на македонски јазик за органска храна и органско производство.  На присутните им беше претставена разликата меѓу органското и обичното производство на храна, од страна на стручното лице, Горан Колев.

Дел од атмосферата на фотографиите:

УНГАРСКА РАБОТИЛНИЦА

На 25 октомври 2019 година, се одржа тричасовна работилница во соработка со здружението „Теледом“, по повод унгарскиот празник, 23 октомври. На работилницата присуствуваа ученици кои се членови на Вики Клубот во Музеј на македонската борба, кои создадоа осум нови статии на Википедија на македонски јазик за туристички места во Будимпешта. На крајот, добија благодарници за своето учество.
Дел од атмосферата на фотографиите:

WIKIMEDIA CEE MEETING 2019

Годишната конференција на Википедијанци од Централна и источна Европа се одржа во Белград од 11 до 13 октомври 2019 година. На конференцијата беа разменети искуства, беа одржани предавања и обуки на разни теми поврзани со работата на Википедијанците, а присутните имаа можност и да се информираат за најновите проекти што ги спроведуваат Википедијанците од другите држави.

ГЛАМ Македонија испрати свои претставници. Наредната ваква конференција ќе се одржи во Охрид, во текот на септември 2020 година.

Дел од атмосферата на фотографиите (автор Миодраг Магдевски)

Wikimedia CEE Meeting 2019 participants 02

Wikimedia CEE Meeting 2019 Day 0 - Pre-conference Day 20

Wikimedia CEE Meeting 2019 day 2 - 06

САЛОН ЗА СТРАТЕГИЈА ЗА МЛАДИ

Во Скопје, на 10 септември 2019 година, се одржа првиот „Салон за стратегија за млади“ во организација на ГЛАМ Македонија. Здружението за умножување на слободни содржини ГЛАМ Македонија, како дел од семејството на групи и ограноци на Викимедија, за првпат го донесе овој вид на собир на активисти на движењето Викимедија во нашата држава, најпрвин со „Салон за стратегија“ за возрасни, кој се одржа на 27 јули, а сега и со „Салонот за стратегија за млади“, во траење од три часа.

„Салонот за стратегија за млади“ во Скопје беше еден од единаесетте салони одржани низ светот, а одобрени од Фондацијата Викимедија, каде за првпат на картата се најде и Скопје. Салонот се одржа на 10 септември, на кој зедоа учество вкупно 33 ученици, сите членови на Вики Клубовите кои ги раководи ГЛАМ Македонија. Учениците доаѓаа од над 10 училишта од Македонија, односно, од 4 различни Вики Клубови.
Активностите на учесниците на овој „Салон за стратегија за млади“ беа поврзани со дискусија за тоа како да се постигне поголема вклученост на младите, како да се поттикнат различните групи да бидат присутни како уредувачи на Википедија, а едно од клучните прашања на кои се дискутираше беше и прашањето поврзано со волонтеризмот, како и за лошото однесување на Википедија од страна на некои корисници.


Фондацијата Викимедија веќе подолго време активно работи на реализацијата на својата визија за што поголем и бесплатен пристап на луѓето до слободното знаење и информации. Преку нејзиниот најголем проект „Википедија“, Фондацијата до сега има достигнато огромни резултати. Википедија на македонски јазик е дел од семејството на јазици на кои се прикажува Википедија, и истиот има над 100.000 статии. Целта на ГЛАМ Македонија и нејзините активисти е овозможување на што поголеми и подетални содржини на македонски јазик, секако бесплатно за користење и умножување.

ВИКИМАНИЈА СТОКХОЛМ

Годишната конференција на Википедијанци од цел свет наречена Викиманија, годинава се одржа во Стокхолм, Шведска, од 15 до 18 август 2019 година. ГЛАМ Македонија имаше двајца свои претставници, кои зедоа учество и во двата пред-конференциски денови, на предавањата кои беа интензивни, а се учеа техники за соработка, за проширување на членството, привлекување нови уредувачи и слично.

Учесниците на Викиманија оваа година беа поканети од градскиот совет на Стокхолм, имаа можност да бираат предавања на разни теми (ГЛАМ, образование, проектни активности на другите организации), како и да посетат некои музеи низ Стокхолм, што се одвиваше во организација на домаќините.

Најголема атракција претставуваа сендвичите со деликатесната шведска смрдлива риба, сурстроминг, кои беа служени во рамките на една пауза.

Дел од атмосферата на фотографиите:

CEE Meetup at Wikimania 2019. Group Photo

Wikimania2019-openingreception-groupshot-lowres-fuzheado

Wikimania 2019 closing speech

Opening ceremony Wikimania 2019 Stockholm 4

„Салон за стратегија“

Во Скопје, на 27.07.2019, се одржа првиот „Салон за стратегија“ во организација на ГЛАМ Македонија. Здружението за умножување на слободни содржини ГЛАМ Македонија, како дел од семејството на групи и ограноци на Викимедија, за првпат го донесе овој вид на собир на активисти на движењето Викимедија во нашата држава.

Салонот за стратегија  во Скопје беше еден од дваесетте салони одобрени од Фондацијата Викимедија, раководно тело на Википедија и нејзините сродни проекти, а за првпат на картата се најде и Скопје. Салонот се одржа во саботата со почеток во 19:00 часот. На овој собир, или службено именуван како „Салон за стратегија“, учество зедоа над 25 најактивни активисти, членови на ГЛАМ Македонија и тесни соработници, поддржувачи и медиумски претставници. Активностите на учесниците на овој „Салон за стратегија“ беа поврзани со дискусија за тоа каде се движи Движењето Викимедија, како да се подобри ситуацијата во Македонија во однос на ова движење, како се гледа развојот на движењето во светот и Македонија и давање конкретни предлози за идни проекти и активности. Поделени по групи, учесниците имаа можност да одговорат на зададени прашања и да дадат конкретни предлози со кои би се зголемило присуството на проектите на Викимедија во општествениот и јавен живот во Македонија и светот.

Фондацијата Викимедија веќе подолго време активно работи на реализацијата на својата визија за што поголем и бесплатен пристап на луѓето до слободното знаење и информации. Преку нејзиниот најголем проект „Википедија“, Фондацијата до сега има достигнато огромни резултати. Википедија на македонски јазик е дел од семејството на јазици на кои се прикажува Википедија, и истиот има над 100.000 статии. Целта на ГЛАМ Македонија и нејзините активисти е овозможување на што поголеми и подетални содржини на македонски јазик, секако бесплатно за користење и умножување.

ВИКИПЕДИЈА: за која сите знаат – и никој не знае

Спасимир Пилев, активен уредник на Википедија на бугарски јазик, зборува за прашањата со кои се соочува секој акитивен уредувач, Википедијанец, во светот, на било која јазична Википедија. Текстот го пренесуваме во целост:

Во последно време зачестија прашањата колку пари земам за пишување статии на Википедија, каква обврска имам таму, и слично, па ќе си дозволам краток коментар.

Не работам во Википедија и не добивам плата, не само јас, туку сите луѓе кои пишуваат статии, закачуваат фотографии или што и да е поврзано со електронската енциклопедија.

-Ау, па ти не работиш таму?
-Не, го правам тоа затоа што ми е задоволство. Секој си е луд на свој начин.

Википедија ја пишуваат доброволци – пишување статии, закачување фотографии, проучување на извори, патролирање на измените, отстранување на било какви „системски текстови“, одговарање на типови кои ја измешале енциклопедијата со жолт печат или бизнис страница, и уште многу друго. За среќа, има и такви луѓе што прават нешто доброволно во полза на другите. Всушност, Википедија на бугарски јазик ја пишуваат Бугари од странство и странци кои го учат бугарскиот јазик. Ова е добра можност за вежбање на јаазикот. Моите придонеси се незначителни во споредба со оние на другите уредници. Има луѓе со по неколку илјади уредувања.

Целта не е да се земат пари од нареден тримесечен проект, да се започне нешто и да се заврши, а целта не е ниту да ме благословува некој, да ме смета за голем, на Википедија не се собираат лајкови, ниту се бара благодарност. Напротив, почесто се случува да ме нападнат, а понекогаш добивам и закани по живот.

Полесно е некој да излезе на јавно место и да кажува колку нечини Википедија, и никогаш да не се нафати да ја поправи грешката, за што е потребна една минута. Википедија ја пишуваат луѓе. За добро или за лошо, луѓето грешат.

Одвреме навреме се појавува некоја публикација во медиумите за цензура на Википедија: еден политичар платил уредувачи да пишуваат против друг негов колега-политичар (во весникот беше кажано обратно). Не познавам сериозни активни уредувачи на Википедија кои пишуваат само за политика, а уште помалку да напаѓаат еден, или да фалат друг политичар. Постојат луѓе кои не ме сакаат, но местото за искажување лично мислење е Фејсбук, а не Википедија. Се случува вработени во некое министерство да ја разубавуваат статијата за министерот, но по некое време нивниот сервер може да биде блокиран за да се запре ова. Да, некој може да биде блокиран на одредено време.

На Википедија секој може да пишува, но и секој може да ги следи злонамерните уредувања и да ги отстрани. Најубавото нешто на оваа енциклопедија е нејзината транспрарентност – секое уредување е видливо. Понекогаш се случува да ми ѕвонат од некои телевизии со барање на сензации, интриги, општо земено, нешто што ќе ја забавува нивната публика. Но, тоа е досадно, брат. Луѓето кои придонесуваат на Википедија не се безделници најдени на улица кои немаат друга работа и не си го ценат трудот, напротив.

Се разбира дека не е лошо човек да добие награда за она што го прави. Но, мене, и сигурен сум и на многумина други, воопшто не ми е задоволство да пишувам статии по нарачка, затоа што во таков случај ќе важи правилото – кој ги дава парите, тој ја диктира музиката. А да ми наредува некој што да пишувам, малку ги побркал лончињата.

Се случува да се откаже донација. Колку организации откажуваат донации? Поважно е Википедија да не се врзува со сомнителни луѓе.

Неколкупати ме подучуваа да си направам интернет страница и таму да си ги објавувам статиите, бидејќи се исплатело. Во ваков случај насмевката ми станува сè поголема, и на крајот прснувам од смеење. Приватните страници за две-три години стануваат мртви линкови.

Искрено забавна ми е поделбата на „вие“ и „ние“.  Како некој да е должен да направи нешто за другите.

-Зошто не сте ставиле слика од она, зошто не сте ја поправиле оваа грешка? Зошто има малку информации во оваа биографија, а тој/таа е толку значаен? И потоа следува заклучокот:
-Ама таму секој може да пишува како сака.

Ете тоа е мојата мотивација да се занимавам со Википедија во слободно време. Не сакам кога некој дава забелешки.

Последната забелешка:
-Ама ти немаш деца, и лесно ти е.

Гледано со туѓи очи, животот на другите е секогаш лесен. Википедија ја пишуваат семејни луѓе со деца, повеќе од едно, кои работат какви ли не професии. А можеа само да даваат забелешки.

Но, многу е поубаво да оставиш нешто за другите!

Линк до оригиналниот текст – https://blog.wikimedia.bg/2019/06/21/wikipedia/

ЗАПОЧНА ДИГИТАЛИЗАЦИЈАТА НА АРХЕОЛОШКОТО БОГАТСТВО

Во текот на месец април и мај, волонтерите на ГЛАМ Македонија започнаа со дигитализација на материјали и артефакти кои се чуваат во НУ Археолошки музеј на Македонија – Скопје. Првите резултати веќе се појавија на Заедничката ризница, од која црпат сите јазични Википедии.

Линк на кој може да се следи напредокот:

https://commons.wikimedia.org/wiki/Category:Archaeological_objects_at_the_Archaeological_Museum_of_North_Macedonia

Инаку ова е  проект што се спроведува по потпишан договор со НУ Археолошки музеј на Македонија – Скопје. Проектот ќе се спроведува до крајот на октомври 2019 година.