COVID-19 И НИЕ

Пред прогласувањето на пандемија од коронавирус, и пред вонредната состојба во земјава, членовите на ГЛАМ Македонија работеа на реализација на неколку проекти, како на пример: Вики Камп за ученици, кој требаше да се одржи во последниот викенд на март 2020 г., конференција за наставници, и неколку работилници кои беа договорени.
Но, поради развојот на ситуациите со COVID-19 во земјава и во светот, ГЛАМ Македонија ги откажа сите настани во живо, на неопределено време.
Членовите на ГЛАМ Македонија за време на пандемијата, под мотото „Остани дома“ работеа на создавање статии на Википедија на македонски јазик, зедоа учество во повикот за уредување на статии по повод „Меѓународниот ден на Ромите“, што се одржа од 7 – 12 април 2020 г.
Во соработка со здружението „Споделено знаење“, го организираме натпреварот за ученици на возраст од 15 – 18 години, што се одвива во период од 15 април до 15 мај 2020 година.
Соработката со Природо-научниот музеј тече, иако не се можни средби во живо. Сепак, матичниот Википедијанец ги подели материјалите со останататите членови, што овозможува дел од работата да биде завршен од дома.
Останете дома, бидете заштиени, и уредувајте на Википедија.

ПРОГЛАСЕНИ НАЈДОБРИТЕ СТАТИИ ЗА ФЕВРУРИ 2020 г.

Во текот на месец февруари 2020 година, вкупно 66 членови на Вики Клубовите што ги води Здружението ГЛАМ Македонија создадоа 134 статии на Википедија на македонски јазик. Жири комисијата прогласи 15 најдобри статии, за кои уредувачите ќе добијат диплома и награда.
Први 5 најдобри статии:
 
Втори 5 најдобри статии:
 
Трети 5 најдобри статии:
 
Им честитаме на добитниците на награди.

ПОТПИШАН ДОГОВОР ЗА СОРАБОТКА СО ПРИРОДОНАУЧЕН МУЗЕЈ

Во февруари 2020 година започна соработката со Природонаучен музеј во Скопје, со потпишување на Договор за соработка. Преку соработка со оваа установа, очекуваме Википедија на македонски јазик да се збогати со нови и подобрени статии за инсектите во Македонија, но и за други теми што се специјалност на Природонаучниот музеј.

ВИКИ КЛУБ ВЕЛЕС

На 18 февруари 2020 година започна со работа седмиот Вики Клуб во Македонија што го води ГЛАМ Македонија, Вики Клуб Велес. Координатор на Клубот е професор Лили Арсова, а на првата обука за уредување на Википедија беа обучени петнаесеттина ученици. Вики Клубот работи во рамки на училиштето „Васил Главинов“.

Во текот на денот, беше потпишан меморандум за соработка со Општина Велес.

Дел од атмосферата на фотографиите:

ВИКИПЕДИЈА НАПОЛНИ  19  ГОДИНИ

На 15 јануари 2020 година Википедија наполни точно 19 години од своето постоење.  Со цел да се одбележи денот, Википедијанците уредувачи од Македонија се вклучија во идејата да се напише статија како подарок. Беа создадени 25 нови статии на Википедија на македонски јазик, од 20 уредувачи. Во вечерните часови, пак, Википедијанците се собраа на средба, каде беше послужена роденденска торта.

Списокот на статии-подароци може да се види на линкот:

https://mk.wikipedia.org/wiki/Википедија:Википедија_19

РАБОТИЛНИЦА „ЗАПОЗНАЈТЕ ЈА СРПСКА“

На 13 декември 2019 година се одржа тричасовна работилница со членовите на Вики Клубот Старо Нагоричане. Членовите на Вики Клубот уредуваа статии поврзани со Република Српска.

Беа создадени 14 нови статии на Википедија на македонски јазик.

Овој проект беше сработен во соработка со Викимедијанската заедница на Република Српска, а во склоп на нивниот поширок проект „Запознајте ја Српска“.

РАБОТИЛНИЦА ОСТЕН

На 6 декември 2019 година се одржа тричасовна работилница со членовите на Вики Клубот Музеј на македонската борба, во просториите на Остен. Присутните ги поздрави директорот Мице Јанкуловски, кој раскажа за своето детство и почетоците на кариерата како карикатурист. Извршната директорка на Остен, Корнелија Конеска , ги запозна присутните за почетоците и развојот на Остен, а потоа започна заедничкото уредување.

Членовите на Вики Клубот уредуваа статии поврзани со работата на Остен.

Дел од атомосферата на фотографиите:

Оглас за вработување

Локација: Скопје

Рок за пријавување: 13 декември 2019 година

Споделено знаење и ГЛАМ Македонија се признати ограноци на Фондацијата Викимедија во Македонија, и двете групи работат на промовирање на Википедија, како и на други проекти.

Заедничкиот грант за 2020 година, добиен од Фондацијата Викимедија, предвидува две работни позиции за период од 1 јануари – 31 декември 2020 година, на кои се бараат иновативни, мотивирани поединци, со добро чувство за професионална одговорност и со работна етика за позициите:

Менаџер на заедницата и Административен и логистички менаџер

Потребни квалификации (за двете позиции):

  • Најмалку ВСС VII/1 степен (или најмалку 240 кредити според ЕКТС)
  • Одлично познавање на англиски јазик (пишување и зборување)
  • Возачка дозвола Б – категорија
  • Познавање на работа со Википедија се смета за предност
  • Работно искуство во невладин сектор се смета за предност

Работно време (за двете позиции):

Работното време е 6 часа дневно, од кои 4 платени и 2 волонтерски часа.

Одговорности и задачи

Менаџер на заедницата:

  • Регрутирање на волонтери
  • Водење на обуки за уредување на Википедија заедно со волонтерите
  • Договарање на соработка со можни партнери
  • Оперативно планирање и раководење на проектите
  • Комуникација со заедницата заради остварување на проектите
  • Организирање на настани и промотивни активности
  • Пишување на извештаи за активностите, како и промотивни текстови и материјали за социјалните мрежи

Административен и логистички менаџер:

  • Подготовка на договори и други потребни документи
  • Извршување на банкарски трансакции и пишување извештаи за банкарската состојба
  • Пресметување на даноци, подготовка на даночни извештаи, нивно поднесување до Управа за јавни приходи
  • Подготовка на документација за законски измени, подготовка на финансиски извештаи и контакти со Централен регистар
  • Следење на законски измени
  • Управување со активности и следење на роковите за проектите
  • Организирање на материјали и услуги потребни за проектите
  • Помагање на Менаџерот за заедница при организирање на настани

Ние нудиме (за двете позиции):

  • Вработување на пола работно време во период од 1 јануари – 31 декември 2020
  • Исплата на регрес за годишен одмор (К-15)

Ве покануваме да ја доставите Вашата професионална биографија (CV), мотивациско писмо и фотографија
​на мејлот mksharedknowledge@gmail.com

Само кандидатите кои ќе влезат во потесен круг ќе бидат контактирани.

https://kariera.mk/job/eiytHaQQIk-mLgq3KCLl5w/menadjer-na-zaednicata-i-administrativen-i-logistichki-menadjer

Работилница за ретки болести

Денес, 4.12.2019, во просториите на Црвен крст Охрид, членовите на Вики Клуб Охрид, што го води професорката Наташа Неданоска, се запознаа одблиску со ретките болести. Нивни гостин беше Гордана Лолеска, активист во здружението “Живот со предизвици”. Оваа средба се оствари со заеднички мотив, а тоа е збогатување на Википедија на македонски јазик со статии на тема РЕТКИ БОЛЕСТИ. Целта е повеќе од јасна, за секоја дијагноза на ретка болест членовите на Вики клубот да уредат соодветна статија, потпомогнати од Здружението за ретки болести. Овој процес се очекува да трае подолг период, а едно заокружување би се очекувало на одбележувањето на Светскиот ден на ретките болести во февруари, идната година.

ПОВИК ЗА ВОЛОНТИРАЊЕ НА КОНФЕРЕНЦИЈА

Ако имаш желба да учествуваш во организирање, да стекнеш нови искуства и да запознаеш нови луѓе, пријави се како волонтер на деветтата средба меѓу Википедијанците од Централна и Источна Европа, Wikimedia CEE Meeting, што ќе се одржи во Охрид од 18-20 септември 2020 година.

Wikimedia CEE Meeting е годишна конференција на Википедијанците од Централна и Источна Европа, со цел умрежување, размена на знаења и искуства, а која се одржува во различни држави. Деветтата конференција ќе се одржи во Охрид. Доколку сакаш да си дел од неа, пријави се како волонтер.

Задачи:

Задачите кои се наменети за волонтерите се пред сè од логистички карактер, односно организирање на промотивни активности, помагање на гостите при самата конференција, преземање на некои одговорности при формалните и неформалните активности и слично.

Времетраење:

Од сите волонтери што ќе бидат ангажирани се очекува својот придонес да го дадат во деновите пред, за време и по конференцијата, во зависност од задачите што ќе им бидат доделени. Доколку ви се допадне работата со ГЛАМ Македонија, можете да учествувате и при организирање на другите активнсоти на здружението.

Рок и начин на пријавување:

Сите заинтересирани треба да испратат кратка биографија и мотивирачко писмо на електронската пошта: glammacedonia@gmail.com најдоцна до 30 ноември 2019 година.

Придобивки за волонтерите:

  • Искуство
  • Дружење
  • Знаења
  • Потврда за волонтирање

За сите прашања слободно обратете се на горенаведената електронска пошта.